مرض تصلب شرايين القلب بيحصل لما الدهون الضارة تترسب جوه جدار الشريان القلبي، وده بيؤدي لتضييق مجرى الشريان وقلة توصيل الأكسجين والمواد الغذائية للقلب. في المقال ده هنتكلم عن إزاي نشخص الحالة دي.
عادةً المريض بيشتكي من وجع في صدره لما يمشي أو يبذل مجهود، بس الوجع بيروح لما يرتاح. في الحالة دي، الشك بيكون عالي ناحية تصلب شرايين القلب. بنعمل فحص لعضلة القلب عن طريق تخطيط القلب وفحص الإيكو، عشان نشوف لو فيه أي علامات لتصلب شرياني شديد اللي ممكن يكون مسبب ضعف في انقباض جدران عضلة القلب.
لو التخطيط والإيكو طلعوا تمام، بس لسه فيه شك، بنعمل اختبار الجهد. لو ظهر في التخطيط علامات بتدل على انسداد في الشرايين، بنبعت المريض يعمل قسطرة قلبية تشخيصية عشان نتأكد من وجود أي انسداد.
في بعض الحالات، لو كان فيه شك في تصلب الشرايين، رغم إن اختبار الجهد طلع سليم، بنعمل أشعة مقطعية على شرايين القلب. الأشعة دي بتوضح لو فيه أي انسداد في الشرايين الرئيسية أو وجود تكلسات في جدار الشرايين.
